Habibimiz oramizda bo'lsalar

Men suyukli Payg‘ambarimiz sollallohu alayhi vasallamning muborak siyratlarini o‘rgana boshlaganimda, hayratda qoldim — ular hayotida bugungi kunimizdagiga o‘xshash juda ko‘p holatlar bor ekan. Ammo ko‘pchilik odamlar bundan bexabar. Shu bois, men Rasuli Akram sollallohu alayhi vasallamga chinakam ergashishni hayot tarzimizga aylantirishni niyat qildim. Chunki biz uchun eng to‘g‘ri yo‘l — aynan U zotning muborak hayotlaridan saboq olishdir. Bugungi jamiyatimizdagi ildiz otgan muammolar, g‘am-tashvishlar va notinchliklarga barham berish yo‘lini ham Habibimizning o‘gitlaridan topish mumkin. Olamlar Sarvari sollallohu alayhi vasallamning tengsiz hayot yo‘llarini o‘qib-o‘rgangan sayin, shunday ulug‘ Payg‘ambarning ummati ekanimdan, go‘zal Islom bilan aziz bo‘lganimdan behad faxrlanaman. Zero, U zot biz uchun mukammal dastur — shariatni o‘rnatib ketdilar.